Имрӯз Вазири нақлиёти Ҷумҳурии Тоҷикистон Азим Иброҳим бо роҳбари калони бахши нақлиётии Фонди авруосиёии мӯътадилсозӣ ва рушд (ФАМР) Александр Рашиков мулоқот кард.

Дар мулоқот ҷонибҳо масъалаҳои марбут ба сохтмони 51 долони зиддитармавиро ба дарозии 5,2 ҳазор метр дар қитъаҳои осебпазири роҳҳои автомобилгарди Тоҷикистон баррасӣ карданд.

Дар мулоқот ҳамчунин муовини якуми Вазири нақлиёти ҶТ Раҳим Бобозода, Директори МД «Маркази татбиқи лоиҳаи барқарорсозии роҳи автомобилгарди "Душанбе-Чанок" дар назди Ҳукумати Ҷумҳурии Тоҷикистон Зафар Шарифзода, намояндаи дафтари Душанбеи Фонди авруосиёии муътадилсозӣ ва рушд Далер Шодиев иштирок намуданд.

Мулоқот дар фазои гарми ҳамкорӣ ва ҳамдигарфаҳмӣ сурат гирифт.

Ёдовар мешавем, ки Фонди авруосиёии муътадилсозӣ ва рушд  (ФАМР) механизми молиявии минтақавӣ бо ҳаҷми беш аз 9 миллиард доллари ИМА мебошад, ки соли 2009 аз ҷониби Ҷумҳурии Арманистон, Ҷумҳурии Беларус, Ҷумҳурии Қазоқистон, Ҷумҳурии Қирғизистон, Федератсияи Русия ва Ҷумҳурии Тоҷикистон таъсис дода шудааст. Ҳадафи ФАМР мусоидат ба суботи иқтисодию молиявӣ дар давлатҳои иштирокчӣ, инчунин дастгирии рушди устувори онҳо мебошад.