• То ба шаҳри Хоруғ расидан дар роҳи автомобилгарди Душанбе - Кӯлоб - Қалъаихум - Хоруғ 132 тарма ва 8 сангсел фуромада, роҳро маҳкам карда буд. Роҳсозон дар пайи тоза карданашон шабу рӯз дар сари роҳҳо қарор доштанд, роҳро мекушоданду пас аз лаҳзае боз селу тарама онро мебаст. Ба қавле бо тармаҳо дар набарданд роҳдорони мо дар мавсими боришот, - гуфт вазири нақлиёти кишвар Азим Иброҳим пас аз анҷоми сафари корӣ ба ВМКБ, ки рузҳои 21 - 23 феврал ҷиҳати шиносоӣ бо рафти бартарафсозии оқибати боришоти барфу борон ва тармафуроӣ анҷом дода буд.
• Дар натиҷаи боришоти беист ва фуромадани тармаву сел хисороти  молию ҷонӣ зиёд ба қайд гирифта шуда буд.

Вазири нақлиёт ҳангоми сафари се рузааш ба Бадахшон бо ҳайати мутасаддиёни соҳа кори роҳдоронро мавриди санҷиш қарор дода, ҷиҳати ҳарчӣ тезтар тоза кардани роҳҳо аз барфу тарма ба мутасаддиён дастурҳо дод. Аз масъулини муассисаҳои нигоҳдории роҳҳо даъват кард, ки барои фароҳам овардани шароит барои коргарон чораҷӯӣ карда, онҳоро бо хӯроку либоси гарм пурра таъмин намоянд. Ҳангоми боришоти сахт ё фуромадани туман эҳтиёткор бошанд. Техникаву таҷиҳизоти роҳдорӣ бояд дар ҳолати омодабош қарор дошта, навбатдории шабонарӯзӣ идома дода шавад.

Дар доираи ин сафари корӣ Вазир бо кормандони МДНРА - ҳои ноҳияҳои Восеъ, Данғара, Рӯшон ва Дарвоз суҳбатҳои сарироҳӣ анҷом дод.

Вазир ҳамчунин  дар ҷаласаи ситоди гуруҳи кории Ҳукумат, ки таҳти раёсати Сарвазири мамлакат муҳтарм Қоҳир Расулзода дар шаҳри Хоруғ баргузор гардида буд, иштирок ва суханронӣ намуд.