Новости

slider_img

807 ҳазор доллар барои навсозии роҳи автомбидгарди Тугарак-Саричашма-Шӯрообод ва Чашмасор-Лангар ҷудо мегардад

Дата: 03-11-2022 Просмотрено: 521
  • Дар натиҷаи ба роҳ мондани ҳамкориҳои боэътимод бо Фонди Кувайтии рушди иқтисоди Араб, Фонди мазкур ҳавасмандии худро вобаста ба маблағгузории асосноккунии техникиву иқтисодии лоиҳаҳои таҷдиди роҳи автомобилгарди Тугарак - Саричашма - Ш. Шоҳин ва Чашмасор-Лангар баён намуд. Шурои директорони Фонди мазкур ҷиҳати ҷудо намудани маблағи грантӣ дар ҳаҷми 250 ҳазор динори кувайтӣ (807 ҳазор доллари ИМА) розигии худро баён дошта, 31 майи соли равон Созишномаи грантӣ оид ба  омодасозии асосноккунии техникӣ – иқтисодии лоиҳаи таҷдиди роҳи автомобилгарди Тугарак-Саричашма- Шамсиддин Шоҳин ва Чашмасор-Лангарро барои ба имзо расонӣ пешниҳод намуд ва 19 августи аз ҷониби Вазири молия он ба имзо расонида шуд, иброз дошт вазири нақлиёти Ҷумҳурии Тоҷикистон Азим Иброҳим дар ҷаласаи навбатии Иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон, даъвати шашум, ки 2 ноябри соли равон таҳти раёсати Раиси Маҷлиси намояндагон Маҳмадтоир Зокирзода баргузор гардид.

Вазири нақлиёти кишвар ҳамчунин қайд кард, ки маблағе, ки барои омодасозии асосноккунии техникиву иқтисодии ин ду қитъаи роҳ пешбинӣ шудаасту ба ширкати машваратчӣ пардохт карда мешавад, ҳамчун кумаки бебозгашти техникӣ барои Тоҷикистон пешбинӣ шудааст ва он сарбории иловагӣ ба буҷаи кишвар эҷод намекунад.

Рўзи 16 августи соли равон лоиҳаи Созишномаи грантӣ байни Ҷумҳурии Тоҷикистон ва Фонди Кувайтии Рушди Иқтисодии Араб барои маблағгузории омодасозии асосноккунии техникӣ – иқтисодии лоиҳаи таҷдиди роҳи автомобилгарди Тугарак - Саричашма - Ш. Шоҳин ва Чашмасор - Лангар аз ҷониби Президенти Ҷумҳурии Тоҷикистон маъқул дониста шуд.

Фармоишгари лоиҳа Вазорати нақлиёти Ҷумҳурии Тоҷикистон  буда, Агентии татбиқкунандаи лоиҳа Маркази татбиқи лоиҳаи “Таҷдиди роҳи автомобилгарди Дашанбе-Чанок” мебошад.

Роҳи автомобилгарди Тугарак – Саричашма - Ш. Шоҳин (дарозиаш 48км) аз ҳудуди ноҳияи Восеъ ва Ш. Шоҳини вилояти Хатлон мегузарад. Он имконияти ҳаракати таворавии воситаҳои нақлиётро низ барои ин минтақа таъмин месозад. Оғози роҳ дар километри 168-и шоҳроҳи Душанбе-Кӯлоб-Хоруғ-Кулма ҷойгир аст.

 Татбиқи лоиҳаи мазкур ба сифатан беҳтар гардидани роҳҳои автомобилгарди байнидеҳавӣ, осон гардидани рафтуомади сокинон, афзоиши ҳамлу нақли бор, рушди иқтисодиву иҷтимоии сокинони деҳаҳои пайвастшаванда ба роҳи байналмилалии Душанбе – Кулоб - Хоруғ - Кулма, беҳтар гардидани инфрасохтори сайёҳӣ, таъсиси ошхонаҳои назди роҳӣ, меҳмонхонаҳо, истгоҳҳои таъмири техникӣ, мағозаҳои фуруши маҳсулоти кишоварзӣ ва бо ин тартиб таъсис додани ҷойҳои нави корӣ мусоидат менамояд.

Роҳи автомобилгарди Чашмасор-Лангар бо дарозии 8,5 км дар ноҳияи Муъминободи вилояти Хатлон ҷойгир мебошад. Оғози сохтмони роҳ аз километри 23,5-уми роҳи автомобилгарди Кулоб-Муъминобод оғоз мегардад. Сохтмони ин қитъаи роҳ низ аҳамияти иҷтимоиву иқтисодӣ дошта, ба афзоиш ёфтани ҳаракати воситаҳои нақлиёт, васеъ гардидани имкониятҳои интиқоли молу маҳсулоти кишоварзӣ ба бозорҳои минтақа ва беҳтар гардидани сатҳи некуаҳволии сокинон мусоидат мекунад, - иброз дошт вазири нақлиёти кишвар Азим Иброҳим.  

Лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар хусуси Созишномаи грантӣ байни Ҷумҳурии Тоҷикистон ва Фонди кувайтии рушди иқтисодии Араб барои маблағгузории омодасозии асосноккунии техникиву иқтисодии лоиҳаи таҷдиди роҳи автомобилгарди Тугарак-Саричашма — Шӯрообод ва Чашмасор — Лангар» ба овоз монда шуда, тасдиқ гардид.