• Tajik
  • Русский
  • English

Раёсати авиатсияи гражданӣ сохтори

Вазорати нақлиёти Ҷумҳурии Тоҷикистон мебошад.

Раёсати авиатсияи гражданӣ фаъолияти худро дар ҳамкорӣ бо Раёсатҳои дастгоҳи марказии вазорат, Хадамоти давлатии назорат ва танзим дар соҳаи нақлиёт, корхонаҳои авиатсионӣ ташкилотҳои ҷамъиятӣ ва дигар мақомоти дахлдори вазорат дар асоси Низомномаи Вазорати нақлиёти Ҷумҳурии Тоҷикистон ба анҷом мерасонад.

Раёсати авиатсияи гражданӣ дар фаъолияти худ санадҳои меъёрию-ҳуқуқии Ҷумҳурии Тоҷикистон, инчунин санадҳои меъёрии байналмилалии эътирофнамудаи Ҷумҳурии Тоҷикистон, қарорҳои ҳайати мушовараи Вазорати нақлиёти Ҷумҳурии Тоҷикистон, фармонҳо ва супоришҳои Вазири нақлиёти Ҷумҳурии Тоҷикистон ва Низомномаи мазкурро ба роҳбарӣ менамояд.

Раёсати авиатсияи гражданӣ дар соҳаи фаъолияти муқарраргардида вазифаҳои зеринро амалӣ менамояд:

- татбиқи сиёсати давлатии ҳавопаймоӣ, ки ба қонеъгардонии талаботи аҳолӣ ва эҳтиёҷоти иқтисод ба ҳамлу нақли ҳавоӣ ва дигар навъҳои хизматрасонӣ, инчунин фароҳам овардани шароит барои бехатарии парвозҳо;

- баамалбарории сиёсати ягонаи илмию техникӣ дар соҳаи авиатсияи гражданӣ оид ба ташкили гузаронидани корҳои илмию тадқиқотӣ, илмию техникӣ ва лоиҳавӣ оиди самтҳои бештари рушд ва вазифаронии он;

- таҳия ва барои тасдиқ пешниҳод намудани нақшаҳои рушди авиатсияи граждании Ҷумҳурии Тоҷикистон ва татбиқи онҳо дар заминаи барномаҳои мақсадноки давлатӣ, миллӣ, байналмилалӣ ва соҳавӣ;

- ҳамоҳангсозӣ ва татбиқи сиёсати ҳавопаймоӣ дар фаъолияти байналмилалӣ ва иқтисодии хориҷӣ, инчунин мусоидат ба ҳамкории байналмилалӣ ва минтақавӣ дар соҳаи авиатсияи гражданӣ;

- ташкили истифодаи қисми фазои ҳавоии Ҷумҳурии Тоҷикистон, ки тибқи тартиби муқарраргардида барои хатҳои ҳавоӣ, хатҳои ҳавоии маҳаллӣ, минтақаҳои корҳои ҳавоӣ, аэродромҳо ва фурудгоҳҳои гражданӣ муайян гардидааст;

- таҳия ва ҷорӣ намудани меъёрҳои ягонаи корҳои ҳавопаймоӣ ва ҳамлу нақли ҳавоӣ, стандартҳои коршоямии парвозии ҳавопаймоҳо, низом ва воситаҳои таъмини парвозҳо ва хизматрасонии ҳаракати ҳавоӣ;

Мониторинги корхонаҳои авиатсионӣ.

Парвозҳои ширкатҳои ҳавопаймоии ватанӣ («Тоҷик Эйр», «Сомон Эйр» ва «Ист Эйр») ба 35 шаҳри 10 кишварҳои хориҷӣ дуру наздик (Хитой, Россия, Қазоқистон, Қирғизистон, Эрон, Аморати Муттаҳидаи Араб, Туркия, Германия, Арабистони Саудӣ ва Озарбойҷон) дар асоси ҷадвали парвозҳои мавсими тирамоҳу зимистон ва баҳору тобистон иҷро гардида истодаанд, инчунин хатсайрҳои нав (аз фурудгоҳи Душанбе ба самтҳои Деҳлӣ, Омск ва Тюмен, аз фурудгоҳи Кӯлоб ба самтҳои Екатеринбург ва Санкт Петербург ва аз фурудгоҳи Қурғонтеппа ба самтҳои Москва, Екатеринбург, Санкт Петербург, Казан, Оренбург ва Новосибирск) ба роҳ монда шудаанд.

Парки умумии тайёраҳо ва чархболҳои ширкатҳои ҳавопаймоии Ҷумҳурии Тоҷикистон («Тоҷик Эйр», «Сомон Эйр», «Ист Эйр», «Азия Эйрвейз», «Asian Express», «Хатлон Эйр» ва «Пар Эйр») 71 адад буда, коршоям 24 адад, 12 адад корношоям, дар нигоҳдорӣ 35 адад (истеҳсоли Шӯравӣ), аз ин миқдор 25 адад истеҳсоли ғарбӣ мебошад.

Аз ин миқдори шумораи ҳавопаймоҳо аз ширкати ҳавопаймоии «Asian Express» 7 адад, «Ист Эйр» 1 адад, «Пар Эйр» 2 адад ва «Азия Эйрвейз» 3 адад дар хориҷи кишвар истифода бурда мешаванд.

Корҳо оид ба истифода гирифтани тайёраҳои истеҳсоли ғарб дар ширкатҳои ватанӣ идома доранд.

Фурудгоҳҳои байналмилалии ҷумҳурӣ (Душанбе, Хуҷанд, Кӯлоб ва Қӯрғонтеппа) ҳамарӯза ба мусофирон хизмат мерасонанд.

Ҷиҳати иҷрои қарори Ҳукумати Ҷумҳурии Тоҷикистон аз 4 октябри соли 2011, №460 “Дар бораи «Стратегияи миллии муҳоҷирати меҳнатии шаҳрвандони Ҷумҳурии Тоҷикистон ба хориҷа барои солҳои 2011-2015» дар фурудгоҳҳои байналмилалии Ҷумҳурии Тоҷикистон дар ҳамкорӣ бо Хадамоти муҳоҷирати назди Ҳукумати Ҷумҳурии Тоҷикистон як қатор корҳо ба анҷом расонида шудааст.

Моҳи марти соли 2013 бо иштироки Вазири нақлиёти Ҷумҳурии Тоҷикистон ва сафири Фаронса дар Ҷумҳурии Тоҷикистон бо гузоштани санги аввали терминали нави ҶСК “Фурудгоҳи байналмилалии Душанбе” корҳои сохтмонӣ оғоз гардид. Тибқи нақша сохтмони терминали мазкур 14 декабри соли 2014 бо сарфи маблағи 39 млн. Евро ба анҷом расида, ба истифода дода мешавад. Мутобиқи нақшаи тасдиқшудаи корҳои сохтмонӣ оид ба амалисозии лоиҳаи сохтмони терминали мазкур аз ҷониби ширкати “VINCI” корҳои сохтмонӣ аз ҷумла болопӯши ошёнаҳои якум ва дуюм пурра ба анҷом расида, корҳои рӯйкашнамоии иморат оғоз гардидаанд.

Баҳри таҷдид ва муҷаҳҳазгардонии техникии аэродроми ҶСК “Фурудгоҳи байналмилалии Хуҷанд” дар “Барномаи давлатии сармоягузорӣ, грантҳо ва сохтмони асосӣ барои солҳои 2012-2014” ба маблағи 14,6 млн. доллари ИМА қабул карда шудааст. Марҳилаи  якуми созишномаи қарзӣ ба маблағи 3 млн. доллари ИМА байни ҶСК “Фурудгоҳи байналмилалии Хуҷанд” ва Бонки Аврупоии Таҷдид ва Рушд мавриди баррасӣ қарор дорад.

Дар асоси дастуру супоришҳои роҳбари давлат баҳри баланд бардоштани хизматрасонӣ ба мусофирон баъди таъмири хатти парвоз, фурудгоҳи байналмилалии Қурғонтеппа парвозҳоро моҳи марти соли ҷорӣ аз нав оғоз намуд, ки Раёсат ҳуҷҷатҳои заруриро баҳри таъмини бехатарии авиатсионӣ ва интихоби ширкатҳои ватанӣ мусоидат намуд. Бо амалӣ гардидани парвозҳо ва зиёд шудани парвозҳои мунтазам, роҳбарияти фурудгоҳ тамоми кормандонро ба кор ҷалб намуда, маоши моҳонаи онҳоро 70% зиёд намуд.

Оид ба Созишномаҳои алоқаи ҳавоӣ қобили қайд аст, ки дар айни замон Ҷумҳурии Тоҷикистон бо 17 кишварҳои хориҷи дуру наздик Созишномаро ба имзо расонидааст, ки аз онҳо 7 кишвари ИДМ (Россия, Белорус, Украина, Озарбойҷон, Туркманистон, Қазоқистон ва Қирғизистон), 3 кишвари Аврупо (Люксембург, Германия ва Латвия) ва 7 кишвари Осиё (Туркия, Эрон, Афғонистон, Ҳиндустон, Хитой, Покистон, Таиланд) мебошанд.

Дар айни замон Созишномаҳо оид ба алоқаи ҳавоӣ миёни Арабистони Саудӣ ва давлати Қатар дар сатҳи баимзорасӣ қарор доранд ва инчунин лоиҳаи қарори Ҳукумати Ҷумҳурии Тоҷикистон оид ба маъқул донистани лоиҳаи Созишнома байни Ҳукумати Ҷумҳурии Тоҷикистон ва Ҷумҳурии Корея дар баррасии вазорату идораҳои дахлдор қарор дорад.

Дар доираи татбиқи сохтмони Манораи назоратӣ-диспетчерӣ аз тарафи Вазорати мудофиаи Ҷумҳурии Фаронса ҷаласаи муштарак бо иштироки ҷонибҳои баланди кории Фаронсаву Тоҷикистон дар шахси намояндагӣ аз Вазорати мудофиаи Ҷумҳурии Фаронса, Сафорати Фаронса дар Тоҷикистон, Вазоратҳои нақлиёт, рушди иқтисод ва савдо, молия, вазорати корҳои хориҷӣ, Агентии меъморӣ, Сарраёсати меъморӣ ва шаҳрсозии Ҳукумати ш. Душанбе ва дигар сохторҳои марбут баргузор гардид.

Баъд аз ҷаласаҳои муштарак Ҷумҳурии Фаронса лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Фаронса оид ба сохтмони манораи назоратӣ-диспетчериро ба ҷониби Тоҷикистон барои баррасӣ пешниҳод намуд.

Вазири нақлиёти Ҷумҳурии Тоҷикистон Хайрулло Асоев баҳри ҳарчӣ зудтар ифтитоҳ ёфтани сохтмони манораи назоратӣ-диспечерӣ бо сафири фавқулодаи Фаронса Дар Ҷумҳурии Тоҷикистон ҷаноби Дидье ЛЁРУА мулоқот анҷом дод ва тарафҳо ба хулосае омаданд, ки сохтмони мазкур ҳарчи зудтар оғоз гардад.